副主席禤永明先生致辞内容

• admin
• 2010-04-16
• 其它

尊敬的李展润局长、崔世昌议员、黄如楷议员、各位主持、各位贵宾、各位朋友：

欢迎各位今日莅临参加今日既研讨会！今年我地既报名人数创出历年来既新高，我除左要感谢大家既参与，最紧要既，我一定要感谢我地基金会既主席何鸿燊博士一直以来既支持。今日，何博士有恙在身，未能出席今日既研讨会。我希望大家可以同我一齐，祝福何博士，愿佢早日康復。

随着人口进一步老化，医疗、卫生同健康，已经成为全世界政府最关注嘅议题， 需要医护界、学术界甚至係工商界同社福界一齐合力去大力推动同尽快解决， 否则， 日后我地嘅下一代， 将会为人口老化带黎数之不尽嘅问题， 付出更大嘅代价。 所以， 我特别要向今日嘅主讲嘉宾致谢，因为佢地会为我地讲解， 由老人长者到各年龄阶层将会面对嘅疾病同医疗需要， 好让我地能够为此及早做好准备。

基金会睇到呢个需要， 日后会全力推动呢方面嘅沟通。 我地响置地广场新设嘅电子多功能中心， 会致力三方面嘅发展: 一、係成为一个全方位、 多功能嘅电子互动平台， 俾澳门、香港、中国、以至全世界嘅医学专家同业界代表主办各类研讨会、视像会议同培训课程; 二、 我地又会继续鼓励同支持更多科研活动， 发展一个利用电子科技沟通嘅科研数据中心， 俾全世界嘅专家以至公众，可以互动沟通、切磋交流， 透过我地同硅谷同史丹福大学嘅联繫， 呢个构思经已起步; 三、我地更希望搵到合适伙伴， 共同拓展一个以遥控方式问症诊症、以及俾专家交流嘅超级电子网络， 令我地可以完全打破地域时空界限，成为一个真正嘅无国界医生科研电子平台。

与此同时， 中心嘅澳门健康天地，亦都会继续以电子同互动方式， 为不同年纪市民大众，提供最新、 最贴身同最实用嘅疾病、卫生同保健资讯常识， 令澳门市民不单只可以保持健康， 而且从小已经开始学习。在此，我要特别多谢潘啓迪先生，因为佢係新中心的构思同设计上，都俾左我地好多宝贵嘅意见。

今年， 基金会庆幸能够邀请到几位非常有份量嘅新成员加入; 我在此代表基金会欢迎在座嘅黄如楷议员、卢德华女士以及黄显辉大律师; 另外仲有身在葡萄牙、非常熟识澳门嘅范礼保博士加入; 基金会有左佢地丰富嘅经验、意见同联繫， 一定能够继续发扬光大， 伸展至更大嘅空间， 更阔嘅领域，同埋更高嘅水平。

我当然要鸣谢香港中文大学一直以来的支持，今日，沈祖尧教授虽然唔可以亲身黎到现场，但係一阵佢会以特别嘅方法同我地打气。

最后，响春节来临之际，我代表基金会，恭祝各位身体健康，家庭幸福，虎虎生威！多谢各位！