副主席禤永明先生致辭內容

• admin
• 2010-04-16
• 其它

尊敬的李展潤局長、崔世昌議員、黃如楷議員、各位主持、各位貴賓、各位朋友：

歡迎各位今日蒞臨參加今日既研討會！今年我地既報名人數創出歷年來既新高，我除左要感謝大家既參與，最緊要既，我一定要感謝我地基金會既主席何鴻燊博士一直以來既支持。今日，何博士有恙在身，未能出席今日既研討會。我希望大家可以同我一齊，祝福何博士，願佢早日康復。

隨著人口進一步老化，醫療、衛生同健康，已經成為全世界政府最關注嘅議題， 需要醫護界、學術界甚至係工商界同社福界一齊合力去大力推動同盡快解決， 否則， 日後我地嘅下一代， 將會為人口老化帶黎數之不盡嘅問題， 付出更大嘅代價。 所以， 我特別要向今日嘅主講嘉賓致謝，因為佢地會為我地講解， 由老人長者到各年齡階層將會面對嘅疾病同醫療需要， 好讓我地能夠為此及早做好準備。

基金會睇到呢個需要， 日後會全力推動呢方面嘅溝通。 我地响置地廣場新設嘅電子多功能中心， 會致力三方面嘅發展: 一、係成為一個全方位、 多功能嘅電子互動平台， 俾澳門、香港、中國、以至全世界嘅醫學專家同業界代表主辦各類研討會、視像會議同培訓課程; 二、 我地又會繼續鼓勵同支持更多科研活動， 發展一個利用電子科技溝通嘅科研數據中心， 俾全世界嘅專家以至公眾，可以互動溝通、切磋交流， 透過我地同矽谷同史丹福大學嘅聯繫， 呢個構思經已起步; 三、我地更希望搵到合適夥伴， 共同拓展一個以遙控方式問症診症、以及俾專家交流嘅超級電子網絡， 令我地可以完全打破地域時空界限，成為一個真正嘅無國界醫生科研電子平台。

與此同時， 中心嘅澳門健康天地，亦都會繼續以電子同互動方式， 為不同年紀市民大眾，提供最新、 最貼身同最實用嘅疾病、衛生同保健資訊常識， 令澳門市民不單只可以保持健康， 而且從小已經開始學習。在此，我要特別多謝潘啓迪先生，因為佢係新中心的構思同設計上，都俾左我地好多寶貴嘅意見。

今年， 基金會慶幸能夠邀請到幾位非常有份量嘅新成員加入; 我在此代表基金會歡迎在座嘅黃如楷議員、盧德華女士以及黃顯輝大律師; 另外仲有身在葡萄牙、非常熟識澳門嘅范禮保博士加入; 基金會有左佢地豐富嘅經驗、意見同聯繫， 一定能夠繼續發揚光大， 伸展至更大嘅空間， 更闊嘅領域，同埋更高嘅水平。

我當然要鳴謝香港中文大學一直以來的支持，今日，沈祖堯教授雖然唔可以親身黎到現場，但係一陣佢會以特別嘅方法同我地打氣。

最後，响春節來臨之際，我代表基金會，恭祝各位身體健康，家庭幸福，虎虎生威！多謝各位！